மல்லிகாவை செல்லம்மாளும் பெருமாளும் பெற்றெடுக்கின்றனர். பார்வதியும் சொக்கலிங்கமும் வளர்க்கின்றனர். மல்லிகாவுக்கு ராமனை மணம் பேசுவது பிடிக்காமல் பெற்றவரிடம் சென்றுவிடுகிறாள். பெற்றோரோ ஏழை. கூட்டுக் குடித்தனத்தில் வசிக்கின்றனர். செல்வச் செழிப்பில் வளர்ந்த மல்லிகாவுக்குத் தொடக்கத்தில் இந்தச் சூழல் பிடிக்கவில்லை. பின்னர், ஓரளவு ஒத்துப்போகிறாள். அங்குள்ள படிக்காதவர்களுக்கு எழுத்தறிவு அளிக்கிறாள். அவர்களின் உரிமைக்குக் குரல் கொடுக்கிறாள். பின்னர், வளர்ப்புத் தந்தையைப் பார்க்கிறாள்; சமாதானம் அடைகின்றனர். ஒரு நாள் வளர்ப்புத் தந்தையின் செல்வச் செழிப்பிலும், மற்றொரு நாள் பெற்ற தந்தையின் ஏழ்மைச் சூழலிலும் வாழ்ந்திட முடிவெடுக்கிறாள். இந்த இளம்பெண்ணின் வாழ்க்கைப் போராட்டங்களே கதை.